Dampa bial MLA Lalrintluanga Sailo, MNF MLA chu July ni 21 khan a boral a, a hmun ruak hnawhkhat tur hian ECI chuan inthlan hriattirna a la chhuahlo thung.

Naktip maia Assembly Session neih turah Lalrintluanga Sailo(L) sunna hi House ah neih a ni ang.

Hetih lai hian  eptu party lian ber MNF chuan Dampa biala an candidate tur an la thlang fel lova, party atangin Nomination Committee pawh an la siam lo. Siam thuai an tum niin an hotu thenkhat chuan an sawi.

Congress leh BJP pawhin candidate tur an ngaihtuah chho tan niin thu kan dawng.

2023 MLA Inthlan khan Dampa bialah MNF Lalrintluanga Sailo thlan tlin a ni a, amah hnaih bertu ZPM Candidate Vanlalsailova nena an in thlauhna hi vote 292 a ni.

Vanlalsailova chuan Dampa bial By- election lo awm turah amah ruattu an Party hruaitute lakah lawmthu a sawi a, "Dampa bial mipuite pawhin ruling MLA thlang tlinga, bial hmasawnna tur atan leh ei leh bar zawnna kawnga sorkara palai hna thlen thei tur ber ka ni a, min duhsak turin ka beisei," tiin, Dampa bial mipuite a ngen bawk.